絲絲講場：滙豐區佩兒突然消失
滙豐未來三年削減3,000個職位上星期「正式」開鑼，自從九月公布呢個震撼消息後，平時講得出名嘅中高層都四散，就連上星期先出席過氣候變化商界首腦峰會嘅區佩兒（Teresa）都突然消失，黯然離開獅子行。
銀行嘅公益代言人
區佩兒身為亞太區企業責任及可持續發展部總監，一直都係獅子行公益活動嘅「代言人」，例如博愛單車百萬行、理想社區攝影活動等等，都會見到Teresa芳蹤。絲絲八到，啱啱放完假無幾耐嘅Teresa，今個星期一佢仍然代表滙豐出席咗一個頒獎禮，但估唔到咁快就走咗。
由九月以來，香港見慣見熟嘅滙豐中高層至少走咗半打。最震懾市場嘅就係前香港區一哥馬凱博另謀高就，跳槽到貝萊德做亞太區主席，而負責財富管理業務、見報率奇高嘅李錦榮亦撤退，原本打理滙豐證券業務嘅黃慧群亦求去，計埋兩個退休人士——保險業務主管湯德信同埋交易銀行業務主管郭懷道，仲有遠在北美嘅高層布克，真係兩隻手都未必數得晒。
上星期仍出席function
曾經擔任滙豐亞太區個人理財業務及銷售主管嘅區佩兒，上星期一佢先拍住香港區一姐馮婉眉，出席氣候變化商界首腦峰會。絲絲當日見到Teresa都係笑面迎人，同嘉賓言談甚歡，真係估唔到只係短短一星期，Teresa就離開咗獅子行。
余詩韻