市場熱線：大光燈估值吸引

美銀反口再沽建行，而折讓幅度超過一成，但建行股價竟然不跌反升，要解釋大條道理：美銀差唔多清貨之後不明朗因素消除，而接批貨者肯定非一般人士，至於係淡馬錫抑或匯金，就可憑各位發揮想像力。建行強勢未必代表港股亦係處於強勢，因為尋日全個亞洲魚缸都只係微跌，恒指照舊喺19,000點至20,200點之間牛皮。

歐債問題陰魂不散

古勝記得上周四插水過千點，港股之前一日亦係無懼意大利國債孳息逼近「警戒線」而大升超過300點，所以強弱可以好快扭轉。究竟「7厘魔咒」係咪咁惡？或者過兩日會再有分曉，值得注意嘅係意粉國總理換班當中，五年期國債拍賣仍要6厘3，即係擺明對新總理減債冇乜信心，而鬥牛國同法蘭西亦開始成為空軍目標，歐央行一路捱義氣幫手買債，但到出年初就會乾塘，所以出年個市會更為兇險。

作為大好友嘅股神則好少理，高價追入IBM，股神買科技股真係好少有，但佢唔係買蘋果公司亦唔係買佢個friend隻微軟，話明股神，做嘅嘢並非凡夫俗子所能明白。

尋日表現較好嘅係零售股，賣衫賣金賣錶之類，呢排市民陸續收到6,000蚊，對消費市道會有一定幫助。周大福計劃以25倍PE招股，有人計過彤叔身家或會勁過誠哥，但其他金飾鐘錶股相對會顯得抵買，包括16倍預測PE嘅周生生（00116）同六福（00590），而唔夠10倍預測PE嘅東方表行（00398）更係大把人搭順風車，剩低隻英皇鐘錶（00887）唔知點解咁特別差。

A股回春光證得益

無可否認，弱咗三季嘅A股呢排翻生，由低位已回升約一成，當孖屐預期阿爺會改採取較寬鬆政策之後，成個氣氛當堂唔同晒。A股生性，除咗睇A50（02823）同保險股之外，當然係要睇券商股。中信証券（06030）上市後表現算唔錯，海通證券亦準備來港上市，大光燈（00165）旗下嘅光大證券都係受益者之一。

之前孖屐炒港股ETF同小QFII受惠股，其實喺祖國有證券業務嘅公司唔多，中信証券PE約10倍，海通證券若登陸H股會多個對手，雖然海通招股PE未清楚，但大光燈預測PE唔夠10倍，每股NAV有16.3元，貨比貨肯定唔輸蝕。

大光燈除光證同光銀外，近年積極發展財資管理業務，旗下12個基金包括房地產、私募同創投等，今年上半年利息同投資收益超過2億元，可望愈做愈大。大光燈正處上升軌當中，光銀來港上市死心不息，呢排買大光燈可以食住A股個勢，兼有港股ETF同小QFII可炒，屬比較正路選擇。

古勝