孖妹缸湖遊：歐洲爆煲潮 全球陪葬？

幾年前高妹已經同阿Paul做過訪問，嗰時佢仲每朝早陪仔仔去足球會踢波，放假就多數喺屋企睇研究報告，名副其實係個工作狂。受外圍因素影響，今年港股走勢真係「危危乎」，散戶自然無啖好食，個荷包傷到五顏六色，但估唔到連阿Paul都話「感同身受」！依家IMF（國際貨幣基金組織）總裁拉加德又警告全球經濟可能會進入「迷失十年」，孖妹心諗唔係咁大鑊嘛？我哋仲未儲夠錢買嫁妝喎！究竟未來歐美債務危機會點變化？投資中國經濟又係咪最穩陣？咁我哋就聽吓阿Paul嘅睇法喇。

陳：景順投資管理首席投資總監 陳柏鉅

高妹：唉！以為歐債危機出現曙光喇，點知又再爆鑊甘嘅，港股真係好傷架！

　陳：外圍因素仲係唔明朗，歐債危機短期內唔會得到解決，而且我對希臘救市方案有啲保留，債冚債唔係好方法。其實希臘經濟體系好細，但要歐盟共27個成員國去達成共同救市協議就好難，今次啲國家總理落台，正正暴露咗政治風險點影響財政風險，依家歐債發展真係今日唔知聽日事，所以未來港股走勢依然以波動為主。

政治不穩阻救市步伐

祺祺：我都明白嘅！淨係希臘問題都搞咗咁耐，大家唔好忘記仲有其餘四隻歐豬呀。好似意大利總理都要辭職喇！

　陳：以日本為例，債務佔國內生產總值（GDP）逾200%，過去十幾年其首相頻頻換人，我諗都有10個或以上，而日本直至今時今日嘅經濟都仲咁差，就證明政治風險問題，可以將經濟政策嘅推行有咁耐拖咁耐。依家希臘、意大利國會要籌組新政府，到時可能又要再傾過啲救市方案，最終只會拖慢救市步伐。

高妹：吓？麻煩歐債唔好再拖落去喇，啲政要大佬快快脆傾掂數喇，唔係港股真係仲有排衰o架！

　陳：其實歐洲嗰邊，無論企業債、私人債定政府債都幾高吓，但佢哋可用於救市嘅資金就好少，所以歐盟先會提出希望中國出手救援。講笑咁講，良好嘅經濟體系通常有三張信用卡可以借錢使，分別係政府、企業同埋私人，當呢三張卡碌得好盡時，咁就要去海外搵第四張信用卡，舉例可能要一啲國家嘅外匯儲備買入歐債，或者搵歐洲央行幫忙喇，可見歐債危機已經去到一個令人好擔心嘅地步。

祺祺：算喇算喇，我哋唔好再講歐債喇，愈講就愈驚，不如講吓中國仲好喇，投資中國經濟實無事啩？

　陳：市場對中國經濟係樂觀嘅，但我就係沮喪地樂觀囉，原因係內地經濟發展情況唔係處於正常樂觀面。中國經濟有問題，但大家就希望利用經濟增長去解決，於是列出一份好長嘅清單，起呢樣又起嗰樣，總之就基建、高鐵、核電、保障房、民企貸款等項目一次過重新開始進行，咁樣只會令融資平台再出現問題，到時大家又要再問一句，究竟錢從何來呢？

高妹：原來中國都有危機架？咁仲有無熱錢流入去架？

　陳：雖然我未有九月同埋十月份嘅數，但我都幾肯定熱錢已經喺亞洲市場流緊出去，你睇近期啲匯率波幅就知，韓圜同印尼盾跌咗幾多呀！通常熱錢一走，短期都唔會咁快返嚟。仲有，今年道指較預期好，令唔少熱錢回流返去投資美股，其中原因係部分美股嘅基本因素唔差，估值又唔貴，有啲公司業務已涉及中國，變相美國公司已經賺緊中國人嘅錢，咁即係投資美股等於投資中國喇！

經濟增長質素好緊要

祺祺：歐債又話唔掂，中國又話有隱憂，唔通我真係要去開個美股戶口先得？不過我係「龍的傳人」，一定要買番內地股票嘅！

　陳：咁大家都可以繼續買中國股票嘅，但就要睇個別股票質素喇！雖然本地散戶，甚至有啲財金分析員都希望內地繼續放水去谷經濟，但內地愈谷只會令海外投資者愈驚，因為佢哋並唔係唔知道硬着陸風險。好似泰國咁，九七年之前佢嘅GDP好勁o架，之後一個大浪殺到咪散晒囉！所以大家要知道，經濟增長質素比經濟增長數字係更加重要的，如果一味大力去谷行經濟，咁最後出咗事，到時邊個負責埋單先？

你會借稅貸投資嗎？

交稅季節又到，銀行及財務公司陸續推出稅務貸款計劃，貸息最低在3厘以下。而股市在萬九點水平徘徊，估值並不算貴，今年你會借稅貸投資嗎？據今期《東方產經》網上民調，截至上周末晚上六時嘅結果顯示，38.1%表示「會」，61.9%表示「不會」。

陳柏鉅（Paul）小檔案

家庭狀況：已婚，育有兩子

學歷及資格：畢業於加拿大University of Manitoba，獲取經濟學學士學位，並持有特許財務分析師資格

工作狀況：二○○七年七月出任景順首席投資總監，負責帶領亞洲投資團隊

工作經驗：曾任職William M Mercer（新加坡）、摩根士丹利資產管理（新加坡）、美林資產管理（香港）、AIG Investment Corporation（Asia）

若有料報畀高妹同祺祺或有嘢問，可電郵money.biz@opg.com.hk

高妹、祺祺