市場熱線：中國南車全速起動

意大利同希臘搵到新總理接班，孖屐個心都定啲，因為政治一處於真空期，班空軍仲唔趁你病攞你命？個市大上大落特別多妖孽，標普「誤發」法蘭西降級消息都敢死，唔通大機構就唔會造市？

年代煤機尚有折讓

食品股一係唔入恒指成分股，一入就兩隻，康師傅（00322）同旺旺（00151）齊齊染藍，但得番百零億市值嘅思捷（00330）竟然仲可以留低，可算係最大冷門，上周五股價好似未卜先知升咗4.7%。

濠賭股同金飾珠寶股特別差，兩類股都靠晒祖國大款，周大福呢個禮拜就做路演，有揣測係投資者沽其他股套現買周大福，但周大福唔慌平過人，計落好似六福（00590）抵好多。

Caterpillar買年代煤機（08043），一間美國藍籌公司睇得起一間香港細公司，你話香港係咪遍地黃金？另一奇怪係年代煤機喺消息公布後股價一直在0.77至0.79元之間（收報0.8元），較全購價有超過一成折讓。

鐵路股呢排一洗前排嘅衰氣，皆因有阿爺明撐，鐵道部發債有阿爺擔保可以借平錢，鐵道部有水到所以有得還錢畀中國南車（01766）同北車。原本困擾住南車嘅有兩大因素：鐵道部應收欠款同埋鐵路投資放緩，依家前者應該唔成問題，而鐵路投資雖然未復舊觀，但睇見阿爺咁撐鐵路，等高鐵事故單嘢丟淡咗之後，出年高鐵可能又會全速起動。

南車呢隻股真係大上大落得交關，之前個個當係寶，名副其實國策股，但一撞車之後，即刻車毀人亡，由高位11個幾跌到最低2.38元，即係插水8成，仲衰過啲細價股。隻股可作為鐘擺效應教材，由過度樂觀變成過度悲觀，但試想一想，祖國喺高鐵已投入咁多時間、資源、人力、物力，所謂洗濕咗個頭，唔會為咗一次事故而放棄全盤心機同布局。

高鐵客量漸復正常

再講，溫州事故當中，南車已重申同架車無關，而係訊號系統出問題，至於同胞對高鐵嘅信心亦只係受到短暫影響，例如「十‧一」黃金周就好多條高鐵線都滿座，群眾特點一向係善忘，南車嘅生意可以慢慢回復正常。不過，南車已經由低位回升多過一倍，究竟仲有冇水位呢？

南車高位時PE曾經超過40倍，現時一一年預測PE約12倍，平定貴要睇屬於高增長定低增長股而定，但南車未來要回復兩成以上增長唔難。另外，11.38元跌到2.38元，回升番跌幅一半即係6.88元，但依家市況無謂太貪，首個目標係上次高位5.55元，下個目標最多亦係6蚊附近。

古勝