喺愈來愈推崇社會企業責任嘅風氣下，唔少公司都樂於加入，好似英皇證券集團（00717），最近承擔咗次好有意義嘅工作，為班美國高管提供有意義嘅交流。
呢次活動由浸大旗下永隆銀行國際商貿研究所邀請，為期約一周，一共有32名正就讀美國California State University Fresno EMBA課程嘅現職企業高管參加，佢哋嚟到香港後，除咗有機會參觀香港名勝外，最主要嘅當然係希望藉此難得機會，了解香港金融市場嘅運作，而英皇證券就希望將香港嘅經濟、時事同埋金融市場嘅寶貴經驗同呢批國際學生分享。
英皇證券集團執董何志豪事後仲話，呢次係佢哋首次同大學搞交流團，反應理想，日後會繼續同其他教育團體合作。
絲絲開頭以為呢班高管嚟到香港，會關心香港嘅散戶投資情況，但原來唔係，佢哋反而更加關心外資大戶嘅情況。絲絲諗呢一點可能同香港係國際金融中心有關啦。不過，如果係絲絲，就會想了解多啲香港散戶嘅投資心態，事關香港擁有一群既理智又瘋狂嘅散戶，呢樣係一門好值得EMBA學生研究嘅課題。
（余絲韻）