中國社科院尋日發布咗二○一一年《企業社會責任藍皮書》，全部被評價嘅300間企業中，無論係國企、外企或者民企，佢哋嘅社會責任得分都少得可憐。有26間企業得分零蛋，甚至負分，當中73%仲係名氣響噹噹嘅外資公司，倒數第一嘅就係Adidas，大潤發排尾二。
睇番份藍皮書，今年已經比去年稍有進步，只係整體水平依然仲係「低」，企業社會責任發展指數平均得12.5分，企業只識得「旁觀」，唔採取責任管理措施，亦唔向大眾披露責任訊息。好似Adidas咁，點解會負4分？
專家話，呢間今年頭三季喺內地銷售額高達9億歐元嘅公司，因為冇任何社會責任嘅訊息，所以零分。加埋傳出佢哋嘅產品有環境激素、標籤不實等負面消息，就要扣分。喺26間零分或負分嘅公司當中，19間係外企，榜上有名者包括可口可樂、雪鐵龍、三菱商事、戴姆勒——克萊斯勒等等。
企業社會責任嘅概念源自英國，外資公司喺呢方面一直做得好好，點解去咗內地就走晒樣？據律師講，內地法律對企業完全冇威懾力，淨係睇吓搞到渤海灣一鑊泡嘅康菲，漏油咁大件事只係罰20萬人仔，人哋點會怕你呢？