交通銀行（03328）終於衝出亞洲，喺英國倫敦成立一家海外子銀行，點解揀英國？唔知同佢哋嘅主要股東之一嘅滙控（00005）有冇關係，咁重要嘅里程碑，交通銀行董事長胡懷邦固然要親身見證，就連滙控現任，同埋前任嘅主席都嚟咗。
滙控喺○四年入股交行，今次交行可以喺倫敦成立子銀行──交通銀行（英國），象徵住交行邁向國際化，對交行全球金融服務能力進一步提升。
為咗呢個歷史時刻，佢哋搞咗個慶典，有成380人參加，好多仲係猛人，當中一定唔少得胡懷邦，滙控主席范智廉、依家做咗英國貿易與投資國務大臣嘅前滙控主席葛霖都到齊，仲有好多嚟自英國各地嘅中資企業代表、金融代表參加，近四百位嘉賓一齊分享呢個盛事，認真陣容頂盛。
間公司主要業務係存款、貸款、貿易融資、債券投資等。胡懷邦話，交行要「以亞太為主題、歐美為兩翼」，將來仲諗住喺三藩市同悉尼開分行，建立國際網絡。據胡懷邦講，早喺九三年，交行已喺倫敦設立代表處，係最早喺英國設立機構嘅中資金融機構之一。經過近兩年嘅申設及籌備，至攞到英國金融服務管理局批准成立。
余絲韻