市場熱線：兗煤有炒上條件

因使大咗令全世界都要捱世界嘅歐洲，最新發展係意粉國的十年期債息一度飆至6.68厘新高後明顯回落，執筆時未知預算案舉手票決的結果，不過，對呢個債務達到全國GDP120%的意粉國都係Too Big To Fall，可以繼續吊住鹽水。

電力股終翻身有望

本地魚缸尋日窄幅牛皮，全日波幅兩舊幾，外圍消息無嚟新意之下，大家北望神州，估吓今日公布嘅CPI數字，開大定開細之前，轉炒通脹回落的受惠股份。電力股全部打空翻，仲先同自己叉足電，華能（00902）彈高一成一，潤電（00836）都有近8%進帳，背後力撐的原因係全國入冬，再鬧電荒，煤價又貴，加價在前。據缸邊友講，祖國七個省市政府近期實際已經自行調高電價，相信未來加入調價行列的省份會再增加。電價一加，緊箍咒攞走，電力股翻身在望。

康師傅（00322）尋日股價先回氣，其他「兄弟姐妹」就有理無理一擁而上，小肥羊（00968）私有化建議獲批，股價即彈一成半，連業績一般的匯源（01886）都因曾經被可口可樂睇中，連續三日做好，係咪一直望嫁得出嘅佢又有機會，定係大家炒得太開心，古勝烏卜卜。酒業股的通天（00389）、王朝酒業（00828）都升到有板有眼，齊齊舉杯暢飲。通脹回落，阿爺放水，飲飲食食消費股睇嚟都可以開快車。

業務版圖不斷擴大

內地股市由政策主導，煤炭行業在祖國「十二五」規劃下，產量增長由國家話事，小型煤企更係買少見少，「大吃小的遊戲玩下去」，受惠的當然是大型煤企。本身擁有煤礦、鐵路運輸、煤化工以至電力一條龍式業務的兗煤（01171），最近頻頻出招，內外頻繁地進行購併，其附屬早前收購了兩間澳洲公司，涉資2.96億澳元，令其在澳洲的業務規模更形擴大之外，另一附屬又購入加拿大鉀礦資源探礦權，代價為2.6億美元。版圖不斷擴大之下，業績亦有交待，上半年收入增長32.9%，盈利大增90.9%，經營狀況理想。

由於冬季是煤炭企業的傳統旺季，近日便不時有報道指動力煤平均價格升至每噸853元人民幣，是最近一年以來最高水平。在產能整頓的大方向下，供應緊張，需求又因冬季來臨電力需煤作燃料，供需不均的大方向下，煤價短期回落機會不大，情況有利於煤企的盈利率，兗煤又是同類規模煤企中最低估值的一間，股價突破20元之後未見回頭，動力強勁，有望挑戰100日線23.61元。

古勝