絲絲講場：東方匯理Frederic：歐美經濟「赤條條」
由歐債危機引發嘅海嘯，唔細得過美國喺○八年引發嗰場，真係五十步笑百步。尋日絲絲去聽東方匯理私人銀行首席投資官Frederic Lamotte，就住投資前景、策略、環球同亞洲經濟前景嘅睇法，佢用咗個好貼切嘅比喻形容啲「強國」。
Frederic叫大家嘗試幻想吓，有兩個人喺一間完全黑暗嘅房入面，其中一個就無着衫，手上揸住支電筒，望見另外一個只係着住條褲嘅人，就笑佢衣衫不整啦。之後無端端有個人入房，開埋燈，依家就唔知邊個笑邊個啦。最後佢話，兩個人入面，一個代表美國，另一個代表歐洲。其實依家歐洲同美國嘅經濟都危危乎，真係好令人擔憂。
逆境時見真章
絲絲覺得Frederic以一個「赤條條」嘅比喻形容歐美現時嘅情況，又幾風趣幽默喎。呢個比喻又令絲絲諗起股神巴菲特嘅名言，巴菲特講過，喺退潮嘅時候，至睇到邊個冇着游泳褲。巴菲特嘅大意係話，在順境時人人都係股神，去到逆境嘅時候就見真章，因為大部分人都會喺逆境時露出馬腳，冇番咁上下斤両，隨時連泳褲都沖走埋。