呢排成日見到「20111111」呢堆數字，其實係代表今年十一月十一日，絲絲唔使睇通勝，都知係大大吉日啦，好多人都揀呢日結婚擺酒，又或者打算喺呢人求婚，又或者計劃喺呢日做一啲值得紀念嘅事，就連金融界都好信呢個吉日，仲加多幾條「１」添。
話說證券界喺特首選舉嘅選委會一千二百張選票中，會有十八張選票，證券業組織香港證券業協會新任主席馮煒能話佢哋諗到奇招，期望增加勝算，絲絲真係好好奇佢哋有乜花招，原來係擇日。
正所謂「謀事在人、成事在天」，馮煒能話，協會打算係十一月十一日嘅十一點十一分遞表。呢個時間數字確係靚絕，擇個吉時吉日係咪可以如有神助，咁真係要事後至知。
不過協會對本地金融業發展一直都有唔少建議，如果能夠喺選委會分到選票，咪話唔可以增加牙力。協會打算提名六至八人參選選委會，連佢都或者有機會參加埋一份咁話。