絲絲講場：推動低碳經濟滙控出錢出力
滙控（00005）喺策略日講過，每項營運同埋業務都係經過利潤、效益、環球聯繫等五重考慮，不過應該仲有一項重要業務策略，就係氣候業務喇，講嘅係滙控為咗推動低碳經濟，連續四年協辦氣候變化商界首腦峰會。
滙控如斯重視氣候業務，出席代表都好夠分量，就係九月榮升香港區一姐嘅Anita（馮婉眉）。絲絲記得，Anita升任為滙豐香港區總裁之後，第一次出席公開場合就係倫敦人民幣論壇，今次就應該係首次以香港區總裁身份喺香港出席公開活動。
4年後內地低碳行業佔GDP5%
Anita喺會上提及，內地將會進身成為全球增長最快嘅「綠色經濟」體系之一，估計內地低碳行業喺二○一五年將會佔經濟增長5%；至二○二○年，會進一步增至佔15%，屆時將有望成為全球第二大環保產業國。
Anita仲話，內地企業可以透過香港集資藉以推動發展，睇嚟背靠祖國嘅香港都應該有唔少「綠色」機遇喎。