A股面世21年，而中國證監會主席的衣鉢亦傳到第六任。內地有媒體好細心咁將歷任主席嘅行情走勢比較一番，唔計新上任嘅郭樹清，五位主席嘅「股市心電圖」顯示，尚福林在任係最刺激嘅，嗰市大起大跌，心臟弱啲都頂唔住。
首先係第一任主席劉鴻儒，因為中證監啱啱成立，一大堆規定湧出嚟，所以出現A股第一隻熊。淨係劉主席上場首日，大市就跌咗9.43%，翌日再跌多11.2%。第二任主席係周道烱，佢在位兩年幾，要處理市場近百宗違規案，所以佢有「滅火隊長」嘅稱號。而A股10%漲跌幅嘅限制就係嗰時推出，時值A股首個牛市。
至於第四任嘅周小川，係歷任主席中最有人氣嘅，一話由佢接手，嗰年嘅春節後首個交易日，大市急升9.36%。直至今日，未見過其他主席有咁嘅「待遇」。而尚福林在位長達9年嘅時間內，出現咗百年一見嘅超級大牛市，短短2年滬綜指升咗5倍。
之不過，大市只係用咗1年，滬綜指就由6,100點的高峰跌到落1,600點，跌幅超過70%。喺那些年經歷「大牛大熊」嘅人，心跳時時刻刻過百下，點會唔激吖。郭樹清上任一周仲未見人，市場估計佢上場會打破單邊格局，嚟緊嘅股市心電圖或者會穩陣好多。
余絲韻