市場熱線：哈電不妨望多兩眼

希臘債務未搞掂，意粉國的債息又再飆高，因周二國會要進行預算改革措施投票，總理亦有機會面臨信任投票。外圍繼續一片混亂，香江單憑內地放水的微弱曙光，暫時未能再奮力衝上二萬，尋日更像玩飛行棋咁要先後退幾步，回到19,677點收市。

現時市況缺乏焦點

不過，呢排新盤不斷劈價，古勝身邊啲有錢朋友全部收到經紀Call，叫佢哋唔買都睇吓，唔通生意真係咁難做。祖國地產更加提早過冬，溫總去到俄羅斯咁遠都要表明，下調房價是政府堅定政策，遠處傳來的噩耗，內房股睇怕都無運行。

建行（00939）受到股東美銀再出貨的消息影響，股價急回，其他內銀股都無厘神氣，腳仔軟軟。比較醒神嘅係慳電膽股同鋼鐵股，都係炒吓政策，炒得幾耐古勝保證唔到，總之都係嗰句：有胡就食。

不過，市場又開始炒周五大隻佬成分股季度檢討，剛宣布同百事中國「強強聯手」的康師傅（00322）有機會入選做大隻佬，股價尋日勁彈。公司仲話會考慮分拆與朝日啤酒的合營公司上市，加埋入選大隻佬嘅預測，好消息咁多，大家真係要睇多幾眼。

受到日本福島核洩漏事件影響，停批超過半年的內地核電新項目有望重新啟動，因近日內地盛傳有關101項能源行業核電標準已經報批，短期內將發布實施，預期最快於年底前可重啟新項目的審批，凍結多時的核電設備可重新啟動，成為電力設備股的一支強心針。

哈爾濱電氣（01133）去年簽訂的核電設備合約總額達109.65億元人民幣，佔全年簽約總額25.86%，佔比雖不及傳統的火電設備，但表現不弱，去年核電新增合約額亦是發展核電設備以來的新高，前景一度秀麗。不過，中央一聲喊停，今年年中有關核電設備的新定單只佔新增定單0.88%，比重下降，表現遠遠落後於火電及水電達41.81%及11.12%的比重，所受的影響不言而喻。

核電項目有望解封

若新標準落實，以往核電行業不夠規範，有關安全標準的疑慮可被釋除，新項目展開，核電設備業務將快速復甦過來。哈電於上月四日跌至5.67元52周低位後，跟隨大市緩緩回升，累積升幅近五成。股價早前因市場情緒過分悲觀而跌得「超殘」，而公司今年中期毛利率實際錄得改善，按年上升了3.5個百分點至16.99%，下半年應可透過成本控制及產品組合而持續改善毛利率，預測市盈率10倍，估值過低。

該股連升多日後，昨日觸及8.5元遇阻，暫未能守住100日線，但利好政策隨時公布，買貨時機要好好把握。

古勝