環球經濟驚濤駭浪，唔少蟹民都好想搵人指點迷津，咁啱金融才子陸東最近再推著作《繼續傲行》，成為○九年《智者傲行》延續版。絲絲當然把握機會拜讀吓，不過新書總共有八萬七千字，好難一時全部消化晒，才子即刻推介四大必讀篇。
尋日陸東喺放工時段搞咗個新書讀者分享會，頭幾篇都係好嘢，主要講自身、慈善、家庭同埋事業，尤其是事業部分，總括咗陸東咁多年喺金融圈嘅見聞。陸東仲話慈善都好重要，無論身家多定少，都應該行善，因為無付出就無收穫。
陸東喺《繼續傲行》補充咗呢兩年對金融市場嘅見解，不過絲絲見在場嘅讀者好似唔多夠喉，仍然相當踴躍發問，陸東都好gentleman咁同讀者們進行呢次宏觀經濟心得交流，佢估出年港股將會繼續波動，今年恒指再跌番16,000點水平機會唔大，又預計下周內地公布嘅CPI會回落，但就堅持唔提number，同財經演員好大分別，難怪有人話佢好「憎」啲財經演員，佢就乘機澄清，自己唔係憎財經演員，只係對佢哋嘅搵食途徑唔多認同，有啲反感。