絲絲講場：唐雙寧狂草筆鋒銳利
喺金融界身經百戰嘅光大集團董事長唐雙寧，尋日喺百忙之中同一班年輕人分享書法心得，佢話寫書法係平日繁忙工作下嘅休息，仲話可以令到佢嘅生活有靜有動，得到調整。唔止用口講，唐董事長仲即席示範狂草畀在場人士大開眼界，喺忘我嘅書法境界仲連紙都畀佢寫穿，即時引起大家嘅驚呼添！
唐董事長仲將書法套入金融工作，話寫書法時筆墨有濃有淡，就好似佢以前喺中國人民銀行管信貸工作咁，將同一筆資金投入喺唔同嘅行業，就會有唔同嘅效果，仲相贈在場嘅記者們一句「道可道非常道」添。
遺憾與文史絕緣
唐董事長介紹自己嘅成長之路時，亦同文學書法扣上關係，話年幼時內地出現文化大革命，喺呢個火紅嘅年代無書可讀，之後隨住高考復辦，佢就話自己當年聽從分配而被財經院校取錄，只能同心愛嘅文史絕緣。不過喺「有意栽花花不開，無心插柳柳成蔭」下，陰差陽錯下成為金融家，仲好謙虛咁話令自己喺金融領域有今日嘅小作為。
余絲韻