市場熱線：短炒套利重新部署

古勝就話統統唔係，尤其歐盟峰會開會前，股市早預了幾項措施，是整個歐債危機救援行動中的「最低消費」，古勝認為這4,000點挾倉，來自投資者情緒鐘擺，由德法意鬧交收場的一個極端，搖到明天會更好，歐洲有希望的另一個極端所引致。

歐債問題拖得就拖

講到明係一個極端，古勝當然唔信G20峰會幾日之間，就將所有問題解決。至少，明年歐洲銀行點樣由希臘賴債，資本不足下籌集1,000億至1,400億歐元維持足夠資本充足額度，又唔需要被國有化，諗起都已經頭痕。從來搵錢艱難，洗錢容易，希臘有借無還，至於其他四隻歐豬會唔會有樣學樣，只有天知曉？

上星期通過EFSF後，意大利拍賣十年期國債，中標息率又再創新高，由一個月前5.86厘彈番上6.06厘，創加入歐元後新高。你或者信淡友未完全投降，股市挾空倉仲會持續，但至少債券投資者唔係咁睇，借錢畀四隻歐豬，唔該畀多些少利息！

港股一個月內，兩次完成六日連升壯舉，上周五十月期指結算日，恒指升330點報20,019點，以接近千一億成交額，突破兩萬點關口，好友可喜可賀也，可憐恒指一句唔該都無，升穿熊證密集收回區19,200至19,700點，熊仔一掃光！然而，在下建議短炒者不妨考慮先鳴金收兵，一來上周五恒指走勢蠱蠱惑惑，早市抽高，去到20,272點高位後，有無以為繼的情況，牛皮悶局至收市，好明顯是好友力托結算價，殺盡淡友的伎倆。

結算後，挾倉主角內銀股第三季業績炒完，加上吊頸都要抖下氣，回番去50日線，經已要見18,915點，距離千點過外。中線角度，恒指剛剛反彈今年跌幅一半，即24,469點跌至16,170點，反彈阻力20,320點同上周五高位差唔夠半百點。如果看官咁英明神武喺低位撈貨，古勝建議你可以設定止賺，盡量將利潤放大，假如無貨兼成手現金的話，等大市回落再諗入市未遲。

講開內銀第三季業績，除中行（03988）外，整體都比預期好，主要係期內淨利息收入因為貸款利息升而增加，手續費及佣金上升，更重要係減值損失下降，同市場預期地方債爆煲，賴債下拖累銀行壞帳增多的主觀意願頗有距離。

淡友難再肆無忌憚

一眾內銀股中，以中信行（00998）及農行（01288）業績增長最勁，分別升41.4%和40.3%，不過，股價同樣由月初低位反彈48.1%及57.8%。經過一輪挾空倉，唔少內銀股價已經返到去八月中旬，對沖基金開始瘋狂沽空遊戲的成本價，到底係繼續挾，挾到空軍統統棄械投降？抑或淡友始終實力較強，守住這道防線要大市再跌過？相信祖國第四季的GDP增長再收窄幾多，甚為關鍵，不過，溫爺爺已經打晒開口牌，宏觀調控唔會一成不變，可能會有微調空間，多少令淡友唔能夠像八、九月肆無忌憚。

經過八、九、十月過山車一樣的市況後，似乎今年餘下兩個月，剩低四十幾個交易日，個市好大機會由好淡對峙，日日幾百點上落，漸漸走向平淡的節日氣氛。

古勝