智能手機市場鬥得好緊要，蘋果公司嘅一哥地位終於保唔住，畀三星電子趕過。不過，蘋果教主喬布斯之死，令被視為iPhone for Steve嘅iPhone 4S開售首周已經勁賣400萬部，銷情所向披靡，或者會令蘋果喺第四季重奪一哥寶座。
市場研究機構Strategy Analytics最新數據，三星第三季賣咗2,780萬部智能手機，蘋果以1,710萬部屈居亞軍，而諾基亞以1,680萬部保持第三。
三星喺上季智能手機市佔率由去年同期的9.3%跳升至23.8%；蘋果公司市佔率則由17.4%降至14.6%；諾基亞市佔率由32.7%急跌至14.4%。幾大手機商銷量都大增，皆因上季全球智能手機市場大增44%至1.17億部。
絲絲相信，三星做到「冧把溫」，係因為轉投Google旗下Android陣營，成功提升旗下Galaxy系列智能手機及平板電腦銷量，但蘋果公司上季受累「蘋果迷」等待iPhone 4S推出，令手機銷情未如理想。不過，依家「蘋迷」瘋搶iPhone 4S，一哥寶座隨時有變。