絲絲講場：恒生新將激勵Cross Selling
恒生銀行（00011）零售銀行及財富管理業務主管嘅陳力生（Nixon）九月上任，大家都好期待佢會點大展拳腳，皆因Nixon一向管開企業及商業銀行，依家改攻零售業務，未知管理方式會有乜唔同，Nixon一啲都冇「收收埋埋」，好慷慨畀咗同事兩大「貼士」。
Nixon嘅兩大貼士分別係「業務轉介」同「敢言創新」，佢特別提到一個交叉銷售嘅例子，話說恒生有個客做咗單1,700萬元嘅按揭，負責嘅同事發覺個大客竟然無恒生戶口，於是就推介埋理財服務，最終個客仲敍做多1,000萬元存款添。呢個就係Nixon眼中成功嘅Cross selling例子，相信佢嘅同事識做啦。
咁Nixon又點睇佢啲新同事呢？佢就以「好叻」嚟形容，大讚同事唔單止專業知識豐富，有好強嘅解難能力，而且同客戶嘅關係都好好，當然，最重要嘅喺對銀行有深厚感情。
寶貝仔先係「大客」
講起按揭，恒生分行網絡及抵押貸款業務主管譚麗琼（Peggy）過往十年都喺抵押貸款部磨練，乜野類型嘅按揭大客都見識過，不過佢笑言有個「大客」非常想吸納，就係佢個寶貝仔，皆因要佢喺兒子未有女朋友前，盡量爭取時間相處。Peggy話，工作與生活平衡，咁先可以令工作事半功倍。
余絲韻