成日走出走入神州大地，都會發覺依家內銀開到通街都係，祖國嘅金融服務業已經進入高速發展嘅階段。咁多間內銀嚟講，農業銀行（01288）近年積極嘅改革步伐，有機會喺未來幾年突圍而出。
農行作為一間Big 4內銀，算係間清楚認識到自己風險嘅銀行，近年努力改革既有業務，以及不斷減低自己風險，絕對值得大家研究。除咗存貸款業務，農行其中一個優勢，就係業務多元化同地道化。
除咗傳統嘅銀行業務，近年農行亦積極爭取擴張結算業務以及投資銀行業務，而呢幾種業務正正係現今銀行業嘅增長動力因子。農行現金管理交易量達51萬億元人民幣，較○九年增長55.4%。
如果大家仔細分析內銀嘅客戶群，就會發覺農行嘅客戶群絕對唔嘢小！佢嘅現金管理客戶包括中國企業500強入面嘅44%客戶，以及100強入面嘅60%客戶。
投資銀行業務方面，農行亦都唔嘢小！去年投行業務收入100.55億元人民幣，增長69.4%。加上近年完成嘅財務顧問業務平台第二期以及佢嘅財務顧問專家系統，相信未來幾年，佢嘅購併貸款、購併重組、改制上市、投融資等等專業性高增值投行業務，更會領先同儕！以一間高增長企業嚟講，7.9倍市盈率絕對唔貴，將來定有一番作為！一於繼續追蹤，出發！
香港大學電子金融服務榮譽助理教授徐燦傑