絲絲講場：滙豐避險至上取消演習
「佔領中環」行動嘅總部，揀咗喺滙豐銀行中環總行樓下，貪嗰度人流多、地方大，絲絲知道，除咗滙豐保險嘅萬聖節慈善巡遊取消之外，連滙豐銀行總行嘅火警演習都取消。
風高物燥，好易有火警。滙豐好有危機意識，過去幾年都有火警演習，幾千人由不同樓層跑樓梯「碌」落去，喺對面廣場集合，你話幾壯觀呢？今年因為總行樓下都聚集咗一批人，「碌」落去還可以，因為員工喺不同樓層，但行返上去就幾千人一齊，咁混亂，咪搞喇，都係擇日再演習過。
至於萬聖節嘅巡遊，原來滙豐保險係取消成個巡遊項目，唔係改道去對面海嘅伊利沙伯醫院，但善款就照樣捐畀香港癌症基金會。
泰水災 阿頭早有準備
講開危機意識，不得不提滙豐嘅泰國業務首席執行官Matthew Lobner，泰國依家水災相當嚴重，佢原本就住喺偏離市中心較遠嘅地區，佢一早將屋企嘅傢俬全部搬晒上二樓，佢嘅家人齊齊搬走避難。原來Matthew做過八年海軍，求生技能相當充足。佢一早已經儲好足夠自己同家人一個月使用嘅水同食糧，為水災做好預防準備以備不時之需。佢仲話怕自己嘅小朋友悶親，所以預備埋遊戲機畀佢哋，真係廿四孝父親。