絲絲講場：郭氏兄弟酬金增逾７成
新鴻基地產（00016）年報又新鮮熱辣出籠，絲絲當然要睇吓董事們嘅薪水有無跟住佢哋嘅盈利增長而水漲船高，以薪金及油貼計，當然係有加幅啦，今年又多咗一筆叫「股權支付」嘅收入，令到大部分執董嘅總酬金，有明顯嘅加幅。
七位執董之中，除陳國威外，全部都有158萬元嘅「股權支付」收入，郭炳江及郭炳聯，截至今年六月底止酬金總額增幅，足足有80%同77%，總額係387萬同410萬元，不過，比起其他執董，仲差一大截。
黃植榮蟬聯新地「打工皇帝」
今年新地「打工皇帝」依然由執董黃植榮蟬聯，總酬金由舊年1,523萬加到1,793萬元，雖然加幅只有17.72%，但總額係炳江及炳聯兩兄弟嘅四倍有多。睇埋另一位執董陳國威，雖然冇「股權支付」嘅收入，但淨計份酌情花紅，都有891萬，總酬金由892萬跳升65.91%至1,480萬，令絲絲流晒口水。
至於新地其餘七位非執董，就傳統得多，貫徹無加無減嘅多年做法，連郭老太鄺肖卿及大哥郭炳湘都唔例外，繼續保持120萬及130萬嘅薪金水平。