城中富豪買「Dream House」往往一擲千金，要打造金屋，豪宅格局當然精益求精，好似恒地（00012）四叔李氏家族舊年以私人名義投得嘅山頂白加道35號，舊年年底已經獲屋宇署批建3幢大屋，不過，絲絲發現，原來項目啱啱喺上個月又批咗另一份則，總樓面有成26,908方呎，比起之前足足多咗3,158方呎，估計連埋獲豁免嘅發水樓面，每幢大屋樓面最少有成1萬呎。
四叔李兆基講過，第日嗰啲屋起好後，會一家人一齊住。四叔依家已經有六個內孫，大仔家傑嘅三胞胎（智信、智仁、智勇），二仔家誠有兩女一子（晞彤、晞兒、俊熹），徐子淇早前講過，兩個女嘅百日宴係用花園做主題，嚟緊嘅星期日，為囝囝舉行一個家族「迎新」派對，主題會係馬戲團，依家間屋咁大，啱晒四叔同啲孫仔玩，喺大花園起個馬戲團都夠位啦！
絲絲研究過屋宇署資料，白加道35號舊年年底已經獲准興建3幢3層高洋房，總樓面約23,750方呎，之不過，上個月嘅最新獲批方案做咗唔少改動，雖然一樣涉及3幢3層高洋房，但係總樓面就增加咗約13.3%至26,908方呎，仲多咗個1層高嘅更亭同休憩設施；相信係四叔諗到要畀多啲地方孫仔玩，所以加番康樂設施等等。
恒地副主席李家誠喺舊年五月，以當時亞洲區最高樓面呎價逾6.82萬元，從中建企業許世勳家族手上投得項目，當時佢都同絲絲講好大機會用幾億打造成別墅式豪宅。