市場熱線：國美照計未升夠

不過，古勝估計結算後，大市會有多少暗湧，短短四日，大市挾高1,663點，14日RSI是近半年來罕有地逼近70的超賣區水平，先來一個鞏固合情合理。尋日沽空佔大市成交又再拗腰回升，全日79.5億元沽空，佔大市成交8.47%，乃係上星期四以來最高，可見空軍經已開始再動食指。

另外，客觀去睇短期歐洲好消息出晒，內銀股第三季成績表，當今日建行（00939）及招行（03968）兩份曝光，就告一段落，連呢批挾淡倉股都由激情趨向平淡，指數成分股仲可以靠邊個板塊繼續炒上去，睇來睇去無乜心水也。

地產股勿太看淡

地產經紀老友話老細要交「人頭」，當然義不容辭，睇咗九龍一個豪宅示範單位，當日恒指僅僅高過萬八點些少，未有耐見萬九，加埋近期幾乎日日有溫州老闆賣港樓籌旗新聞，以為樓市勢難避免由熱轉冷，勢估唔到場面幾熱鬧。尋日八卦問老友新盤銷情點，再一次出乎意料，價單的中下價賣得唔錯外，貴價特色單位唔少已經同內地豪客「握咗手」，睇嚟唔少股價貼近兩年低位的地主股，唔應該睇得太淡，古勝心水繼續係新地（00016），同埋折讓夠大的信置（00083）。

大升市之中，友邦（01299）只係得0.2元進帳，收報23.9元，鬼佬媒體引述大股東美國國際集團，證實有意思禁售期滿後，減持半數友邦，計埋成批貨唔小嘢，市值60億美元或468億港元，難怪個市咁挾法，友邦始終衝唔穿月中25元高位，睇怕要等批貨散埋出街，友邦至有得諗。

PE較蘇寧吸引

家電零售商國美電器（00493）升0.15元收報2.46元，終於重返管理層自殺式宣布投資房地產嘅股價急跌前水平。國美上月底，股價由2.64元，短短三日插到落1.53元，因為幾千萬地產投資，市值唔見近百九億。市況唔好，管理層不務正業走去搞地產，只不過係催化劑，股民未必留意，公司有批行使價2.79元，一四年九月到期的CB，由跌穿3元，到隻CB由「價內」轉到「價外」，揸重貨芬佬焗住要掟正股套戥，加埋嗰幾日大市氣氛又唔好，跌幅先會咁誇張。

以股論股，除非唔信祖國長遠要推動內需減少對出口依賴，否則無理由個倉無這隻內地家電零售龍頭，況且，預測市盈率13.2倍比A股掛牌嘅蘇寧平一截，值博率都幾高，早兩星期高位2.41元應該有支持，古勝相信，短期重返CB行使價2.79元樓上難度應該唔大。

古勝