為了打假，淘寶今個月初宣布大幅提高年費和保證金，激發唔少不滿新規嘅反淘寶聯盟。一向敢作敢為嘅馬雲就見招拆招，日前佢着住布鞋喺研討會上講話，趁機幫淘寶賣廣告，聲稱着緊嘅布鞋舒服，而且仲係喺淘寶網上買添。
佢帶領嘅阿里集團，近期可謂新聞多多，喺國際上大家關注主席馬雲意圖收購雅虎嘅大計，喺內地淘寶近日就因為收費機制變動，搞到有小商戶群起表達不滿。馬雲自言「自己與政府、外界關係處理是比較糟糕」，又表示自己做生意嘅一大要訣就是「忍」！
淘寶喺近年紅爆燈，絲絲都進貢唔少。中小企業嘅反響好大，喺商務部介入之後，馬雲就閃電式推出新嘅對應措施，承諾投入18億元改善服務，同埋因應小企意見作出適當讓步。
唔知係咪想安撫中小企嘅怨氣，馬雲喺研討會中，提出「做企業很累，小企業累，大企業也累」嘅言論，又話「自己與政府、外界關係處理是比較糟糕」，但就表示自創辦阿里集團以來，深明當未獲外界理解之時，自己就要懂得「忍」，無論十多年前，佢創辦阿里巴巴被部分不懂得互聯網嘅人誤解為騙子，以至近日淘寶改革受到批評一樣，他都係選擇「忍」！