許照中離開僑豐金融後，再戰江湖，與六福集團（00590）主要股東兼行政總裁黃偉常領導為首嘅控股公司，合資組成六福金融服務。好多人問許照中，點解唔「上岸」退休，享清福兼「歎世界」，佢話自己今年六十四歲，唔想退休仲創業，因仍未有滿意嘅「收山之作」。
換言之，佢要攞番個「金像獎」至肯收山？
佢話過去六年，本來諗住搞僑豐金融會係佢嘅收山作，但佢未滿意成績，自己又未心死就此退休，於是寄望今次六福金融，可以完成心願。
佢對新公司真係好有信心，因為六福個品牌知名度高，尤其是喺內地，六福分店數目多，內地客一向好注重品牌，對證券行長遠放眼內地證券市場開放好有幫助。但近期中小經紀行爆發佣金割喉戰，許照中就好淡定，話無意以低價佣金作競爭，會透過提升客戶服務來吸引客戶。
新公司雙方各佔五成股權，合計資本約1.5億元至1.6億元，以許照中為首嘅一方，共有十幾個股東，將全力負責公司營運。 現時公司約有十多二十人，希望半年內公司規模增至約七十人，一年就增至一百人，公司最快於下月正式開幕營業。