市場熱線：東岳借勢炒一轉

魚缸食粥食飯仍係睇住尋晚嘅歐盟峰會開會結果，隔晚美股就因為驚「流會」而瀉咗200點，但隔咗半日又乜都唔記得晒，今次難就難在開大開細任大戶話事，做散戶嘅都係估吓大戶去向，希望搭順風車濕吓腳，依家個市氣勢如虹，就算唔買股都唔敢做淡，況且下個禮拜有「豬20」同聯儲局議息。隔晚美國消費信心同樓價指數都差到無倫，但數據差正好係推QE3嘅藉口。

祖國繼續刺激消費

溫總尋日幫手殺熊，適時適度微調可以解讀為「定向寬鬆」，其實孖屐已炒咗放寬宏調兩、三個月，今次溫總卒之開金口；祖國十月CPI未公布已預喜，皆因食品價格出現明顯回落，年底坐5望4應該冇乜問題。

祖國3部委亦聯合部署刺激消費，仲話每年有一個月定為「消費促進月」，形式可能類似百貨公司每年一度大減價，而推出月份可能係五月或十月配合黃金周，另外會鼓勵網絡購物、電視購物同信用卡消費，同時可以帶動埋廣告、物流同銀行等行業。祖國眼見出口開始唔掂，搞基建又縮水，所以刺激消費係好正路，睇嚟消費內需股可以繼續跑贏大市。

阿爺早幾日亦話推動文化產業去刺激經濟，雖然話祖國嘅文化就係搵錢同使錢，但文化呢樣嘢吓吓計錢就得個殼；廣電總局仲下咗個「限娛令」，唔通今時今日仲要逼人唱紅歌同睇綜合文藝晚會？

業績期好唔得閒，暫時水泥、內銀同電力設備股最對辦，電力股同服裝股就唔對路。細細粒嘅重農行（03618）為內銀業績期先打一支強心針，農行（01288）尋日公布第三季賺多四成符合預期，中行（03988）增長得單位數字，預咗佢最差都冇估到差得咁離譜，內銀股等個市挾埋呢一浸之後應該係時候食胡。

高分子材料成重點

東岳集團（00189）尋日升逾一成，由月初低位計反彈更接近一倍，呢隻股大上大落，中期成績表靚爆鏡，但同時預測下半年製冷劑價格回落，股價插到暈。管理層並冇講大話，因為製冷劑的確價格大跌，淨係上個禮拜R22已跌近7%，其中一個原因係已踏入秋天，冷氣機需求大減。

其實好多發達國家已停止生產及使用R22，歐盟亦研究提高電器環保指標，所以內地幾大冷氣廠都自行研發新製冷劑取代R22，但全球R22生產線好多停產，供不應求，所以東岳上半年賺到笑。而東岳嘅製冷劑可以供應番本身下游業務，高分子材料業務會成為下一個增長點。東岳已反彈到跌幅嘅接近一半，仲追唔追得過係兩睇，但隻股似乎有餘未盡，搭吓順風車無妨。

古勝