日日做到冇停手，成日周圍走訪，都咪話唔辛苦！不過有得學習彼得林治咁，由地道市場發掘股份價值，所付出嘅努力絕對係值得嘅！信義玻璃（00868）主要生產同銷售浮法玻璃、太陽能玻璃產品、汽車玻璃產品、建築玻璃等等。其中，優質浮法玻璃同太陽能玻璃產品就最受歡迎！當中建築行業同汽車行業對玻璃產品十分渴求，集團食住呢個勢，發展咗兩條日溶量分別為700噸同900噸嘅浮法玻璃生產線！只要有個市場喺度，公司不斷整合自己嘅製造業務，慳成本之餘又有利將來發展，你話係咪？
針對環球經濟狀況，集團由○九年起，重點搵成本較低嘅清潔能源——天然氣，代替價格不斷上升嘅重油。而集團蕪湖工業園嘅優質浮法玻璃生產線，亦令集團擁有大量低成本嘅優質玻璃，從而喺激烈競爭嘅市場入面取得主導地位。
集團近五年盈利升咗3倍，股東權益回報（ROE）達26.3%，工業股嚟講真係唔話得！一於繼續追蹤，出發！
香港大學電子金融服務榮譽助理教授徐燦傑