Smart Money：善用稅貸賺高息回報

銀行貸款嚟講，又真係唔可以亂借，因為唔係樣樣都咁着數；不過，大家每年都要交稅o架啦，正好稅貸就成為一種幾安全同低成本嘅貸款。依家樓市成交咁低，銀行資金要搵出路，稅貸自然都成為其中一個目標啦！

還款期免超12個月

今年稅貸市場比以往都熱鬧，提供嘅優惠都幾多，咁多間銀行都搶客咁款，用特低稅務貸款搶市場。大家格過價之後，揀到合心水嘅 Plan就可以出擊。

貸款額方面，一般都借到月薪嘅6至8倍，或者稅款嘅1至3倍，還款期有時可以延長到48個月，不過筆者就建議大家盡量12個月算，以免帶條數去另一稅期啦，係咪？通常稅貸嘅利息都非常低，實際年利率唔會超過5%，喺依家咁低息嘅環境，加上高通脹，大家當然借得就借啦！

咁借咗錢之後要點做？要留意嘅係，我哋每個月都要繳交定額還款，所以真係好難做一次性投資。不過計掂數之後，如果每個月還款額又唔係太肉痛，人工都仲頂得住，咁又可以諗吓點樣善用呢筆借番嚟嘅「未來錢」。

依家出面環境咁惡劣，借番嚟嘅錢又唔算係閒錢，當然唔適合投資高風險玩意啦。比較令人放心，又可以比銀行還款利率高嘅產品，仲要低風險時，我諗到嘅就只有債券喇！不過日常大家投資債券又驚間公司執，所以買債券都要揀可以分散到投資風險嘅，你話係咪？

債券基金回報穩

用2至5%息口借咗稅貸，目標回報率當然要有10%左右啦；依家市況，如果自己買債券，一來香港債券市場唔係好發達，二來買單一債券犯本之餘，喺咁嘅市況入面都唔知間嘢會唔會執，係咪？所以最好就係分散風險喇！大家不妨諗諗用高收益債券基金嚟分散風險，一來呢堆基金嘅經理真係要考察間公司會唔會執，二來佢一大堆債券買咗返嚟可以幫大家分散咗個風險，三來回報有番咁上下。

其他債券類型包括，政府票據/債券、公司債券、公司商業票據、可換股債券、零售存款證等等。債券並唔完全保證100%保本嘅產品，大家千祈唔好誤會。如果打算自己單獨出擊，個別購買債券，就要考慮（1）間公司會唔會執，如果唔執，都可以拎番本金同利息；（2）買債券時有無折扣，好多債券喺二手市場時會以折扣價放售。一於鎖定目標，繼續追蹤、出發！

香港大學電子金融服務榮譽助理教授徐燦傑