市場熱線：中旅落後風險低

雖然ADR跟美股大升超過300點，但如果禮拜日歐盟冇料到嘅話，港股今日相信唔會勁升。外電話點樣槓桿化EFSF有7個方案咁多，相信有排拗數，而希臘撇帳幅度愈講愈多，削五成都鬼食泥，削六成會唔會一拍兩散？未來三日都係得個等字，如果今朝港股大幅高開，更加冇追貨價值。

成交淡靜暫欠主題

上周五港股乜都細，波幅細、成交細、連沽空都細埋，連淡友都收工，恒指收市升得42點勉強重返萬八樓上，成交得450億元。雖然好似好淡靜，但二三線股表現其實唔曳，升幅榜頭39位升幅都喺一成以上，上升股數係下跌股數兩倍有多。「小甜甜」3隻孤雛：安寧（00128）、丹楓（00271）同宏霸（00802）齊齊急升，原因係「風水陳」搞最後上訴，一旦失敗就正式玩完，到時幾隻股就唔使做無主孤魂。

內銀股炒業績，加埋地方發債開綠燈，撐得起大市，但其他好似冇乜好炒，大笨象（00005）要受歐洲錢莊集資千億歐元影響，祖國移動（00941）增長放緩，兩隻保險股業績唔慌好，兩大石化股呻煉油蝕錢，地主股又遇劈價潮同加息潮。唯一好消息係俗稱「小直通車」嘅港股ETF就快扑錘。雖然古勝覺得唔會有幾多同胞幫襯，但亦唔排除證券股又趁機炒吓。

中煤（01898）同兗煤（01171）兩大煤炭股業績差，今日難免遇沽壓，但嚟緊踏入旺季，又唔使睇得太差，至少會好過太陽能股同體育用品股，古勝上個禮拜亦有分析過呢兩類股點解咁差。比較下，太陽能股要靠歐洲，體育用品股話晒內地消費市道仲幾好，「田雞博士」（01698）同寶姿（00589）之前亦被外資大行唱淡同掟散，但出咗銷售數據轉好後就唔同晒。

分拆酒店提升價值

A股又創兩年半新低，總成交亦得821億人仔，中港股市同病相憐。祖國出口開始唔掂，但內需仍然旺盛，「十‧一」黃金周除消費總額上升17.5%外，全國共接待遊客3.02億人次，增長18.8%；實現旅遊收入1,458億元人仔，比上年同期增長25.1%。講旅遊，自然係想講香港中旅（00308），前排曾跌穿1蚊，上周五收報1.1元，雖然隻股唔會係彈升三五成嗰類狂野分子，但睇內地旅遊業一路增長，中旅可以同步增長已經夠殺。

其實中旅概念同之前冇乜改變，只不過升跌要跟大隊。中旅上半年成績表已話畀大家知，公司已擺脫低潮，海泉灣度假區轉虧為盈，未來亦有分拆酒店同注資概念。

中旅幾項業務拆開來講，回鄉證業務最穩陣，景區業務穩中有升，而增長最快係酒店業，而休閒度假概念令到海泉灣起死回生，所以搵落後股又唔想冒太大風險可以揀佢。

古勝