近排內地體育用品股真係好「波動」，包括業績、證券界嘅睇法，就連人事變動都係。
今次輪到中國動向（03818），佢哋舊年請咗個外援CEO，點知尋日就話唔撈，上任前後不足一年，仲要由主席陳義紅同副主席秦大中頂上，唔通家陣內地體育用品行業真係咁惡頂？
呢位外籍女CEO Zerbib，本身都身經百戰，做過Adidas前大中華區CEO，更加係打入中國市場嘅功臣之一，對內地市場相當熟悉。舊年十一月，中國動向先以年薪300萬元人民幣、董事袍金每年17.6萬元人民幣撬咗Zerbib過檔，仲有合共300萬股普通股嘅購股權，有效期至二○一七年，首兩年不得行使多於三成嘅認購權，換購價4.12元，中動向尋日個價得1.42元，睇怕呢批認股權變咗「浮雲」。
今年三月初，中國動向夾埋科網股巨擘新浪網，合共以約7.86億元代價，購入在納斯達克上市的內地科網股麥考林約29%股權，被外界批評帳面虧損；在九月份，耗費一成現金入股阿里巴巴集團，又被券商轟不務正業；六月底止份中期業績仲倒退近七成。再加埋大陸嘅體育用品行業競爭太大，成日畀外資行唱淡兼降級，Zerbib揀呢個時間離開，都好易理解。
余詩韻