諾貝爾經濟學獎嘅得獎者，好多係來自美國，據統計自六九年開始，得獎者中差唔多68%係美國人，連今年兩個新出爐嘅得獎者亦都唔例外，舊年嘅得獎者就提供咗一個答案。
二○一○年度嘅諾貝爾經濟學獎得主莫滕森，本身都係美國人，佢話經濟學發源於英國，但由美國發揚光大，所以出咗好多優秀兼有名氣經濟學家，不過嚟緊可能有些轉變。
佢嘅門下今年有3個學生畢業，其中兩個就係台灣人，仲有一個雖然係美國人，卻係攞歐盟護照。照佢咁講，即係「貼」自己嘅學生可以問鼎諾貝爾獎啦。
莫滕森係憑有關勞工市場供求失衡現象嘅研究，同另外兩位拍檔一齊獲得諾貝爾獎殊榮，好多人問佢對依家咁「立亂」嘅環球經濟點收科，佢慨嘆經濟學係悲觀嘅科學，結論都係「未來沒有希望」。佢好贊同美國總統奧巴馬提出嘅振興就業方案，但礙於政治因素，方案最終都會胎死腹中，換句話講，即係冇得救！
余詩韻