絲絲講場：郭炳聯親上蘇州簽約
新地（00016）以非常「抵價」攞到南昌站上蓋項目，轟動全城。尋日絲絲喺蘇州見到新地副主席郭炳聯（Raymond），佢淨係同絲絲笑，點都唔肯講投資幾多錢，淨係肯講尋日簽嘅蘇州合作項目。
Raymond如果留喺香港，好鍾意周圍巡，有時睇吓商場人流，有時又去吓旗下嘅電訊公司望吓。
今次去蘇州唔係「齋巡」，而係親自帶隊北上蘇州為集團旗下一個綜合發展項目，同四季酒店集團簽訂一份合作協議，Raymond講，呢個項目除咗有酒店之外仲有住宅。
同四季酒店集團合作
Raymond話今次上嚟簽約嘅蘇州項目，坐落在蘇州工業園區，隔籬就係著名嘅金雞湖畔南岸，環境優美。尋日佢專程上去同四季酒店集團總裁兼首席執行官凱瑟琳．泰勒簽合作協議，足見對呢個項目十分重視。
據新地提供嘅資料，呢個項目嘅住宅部分叫做湖濱四季，第一期好快會推出，將會提供一百三十一座別墅，首批有五十二座。私家花園面積差唔多萬二方呎，喺香港好難搵到咁大咁靚嘅別墅。
余詩韻