市場熱線：彈散格局令人沮喪

法國總統薩爾科齊剛剛添丁，但這位新爸爸認真唔得閒，探完囡囡，就馬不停蹄飛去德國法蘭克福，同德國總理默克爾及IMF商討擴大EFSF規模，可惜德國同歐央行，似乎並無興趣將四千多億歐元規模的EFSF，透過槓桿擴大5至10倍。

早兩日未趕得切跳車嘅股友，今日就要面對係唔係揸貨過周末嘅抉擇，呢個禮拜特別多傳聞，但食粥食飯都係睇禮拜日，有ABCDE幾個餐，大餐係4,400億歐元「發大」變2萬億歐元，但古勝成日問：錢從何來？其餘幾個餐可能都唔會令投資者滿意，個市係風險大過值博率，你睇伯南克跳完「扭腰舞」（OT）同奧巴馬公布刺激就業措施之後嘅股市反應就知道。

本地魚缸單跳攤路

不過，相對於本地魚缸彈完又散，風眼主角歐美呢排其實相當硬淨，港股收市後，道指期貨已由跌轉升，德股跌幅亦大幅收窄，搞到期指收市高水86點，以單跳攤路，今日港股有機會反彈，但最驚係「黑色星期一」。沽空尋日有61.5億元，佔大市成交又增至11.6%，其實扣埋窩輪同牛熊證，沽空佔「正股」成交更達18%，可想而知係幾勁！

唔單止港股差，A股仲差，滬綜指同深成指分別跌2%同3%，滬綜指中段低見2,315點創31個月低位，即係匯金入市完全冇料到。鬼咩！增持1日咁少完全冇誠意，而且冇其他政策配合。

祖國移動（00941）第三季賺得307億人仔，同第二季比跌超過10%，呢隻「恒指Put輪」如果死埋，恒指會死多兩錢重。依家最佳「Put輪」除咗2、3、6之外就係粵投（00270），加埋東江水未來3年又加價，你話坐喺度有錢收兼可以年年加價嘅股有幾多隻？

太保（02601）業績差，連增長最好嘅財險（02328）一樣冇運行，下個禮拜派成績表嘅國壽（02628）同平保（02318）一齊被掟。南昌站地皮畀新地（00016）低價投得，又傳幾間錢莊索性唔借按揭，地主股亦係高危一族。

忽然拉閘玩謝股民

兩隻逆市奇葩同時中段拉閘，第一視頻（00082）同「憤怒鳥」合作，股東開心了；而「田雞博士」（01698）公布出年春夏訂貨量增長40%，升6%之後喺10點9拉閘。兩單嘢均係前日收市後公布，點解要拉閘好難明，咁搞法股民見有好消息都唔敢追，容乜易突然拉閘放狗就冇得走。

體育用品股跌得多個別有反彈，但中動向（03818）個CEO上任唔夠一年又跳船，原本請呢位前愛迪達總裁返嚟救亡，點知咁快就……體育用品股最大嘅問題係急功近利，見一、兩年好景就猛咁開舖，中動向早年成功得太容易，連廣告都唔使點催谷就做到賺錢一哥，同李寧（02331）一樣定價太高，依家要消化存貨有排捱。

公路股亦做咗逆市奇葩，板塊由成渝（00107）中標一條價值117億人仔嘅公路帶起，然後江蘇寧滬（00177）同滬杭甬（00576）亦跟炒。公路股除咗息高之外冇乜特別，而最近祖國鬧油荒，如果冇油，乜車乜路都死火。

中石油（00857）話今年煉油業務要蝕500億人仔，呻窮無非係想阿爺體恤一下，畀多啲補貼或者畀成品油貼近油價，否則煉一桶蝕一桶，隨時好似○八年咁樣大規模鬧油荒。

古勝