銀行開新分行，不外乎都係舞獅以及有一至兩名高層坐鎮。不過，大新銀行（02356）尋日喺大埔開分行就好大陣仗。
六名高層晒馬式咁到場支持，最高領導人階級嘅行政總裁、執行董事，以至部門主管如財富管理、分行業務、證券服務、甚至係人壽業務行政總裁都畀面撐場。
大新銀行執行董事藍章華話，計埋新開嘅元朗分行，分行總數達49間，希望出年再增3間，重點地區嘅分行亦都會設立投資服務專區、證券服務中心、VIP銀行服務中心，仲力銷VIP入場門檻只係50萬港銀，做街坊生意都可以令客人享受到VIP服務。
依家港股非常波動，歐美環境又似乎立立亂。藍生話，香港經營環境都仲係幾好，特別是零售銀行業務，私人貸款同信用卡表現中上，貸款增長唔錯，達到雙位數字，希望全年都維持到咁話，對未來前景都仲係審慎樂觀，唔係就唔會新設或者翻新分行，仲增加咁多人手啦。