依家經濟不景氣，唔少公司都話要開源節流，好似啲大企業高層成日飛嚟飛去，開支都咪話唔貴。大笨象滙控（00005）行政總裁歐智華，之前喺策略日話明要慳錢，就即刻將非核心業務賣得就賣，仲計劃喺未來三年要裁員。
大笨象話要減磅，梗係唔係淨係賣吓嘢或者減吓人手咁啦﹗絲絲收到風，呢排佢哋要求班賓卡要減少啲出差公幹，就算要出差，都要計吓點先飛得最抵喎。班賓卡咁識計數，絲絲諗都應該難唔到佢哋嘅，問題係班賓卡平時坐慣商務或者頭等，逼咗去經濟倉唔知會唔會唔慣呢﹖
有英國負責銀行外出公幹嘅公司話，滙控未來十二個月，外出公幹量差不多可以肯定會大減。其實做生意嘅嘢，唔付出又點會有收穫呢？希望啲公司可以慳得其所，唔好適得其反就好啦！下次搭飛機嗰陣，見到王冬勝（Peter）坐喺隔籬都唔好詫異啦！