今年個市「古惑」難玩，就真係唔使問絲絲，齋睇報紙都知得一清二楚，好多神級投資者都輸到要「認錯」，堪稱經典。不過，難玩嘅市都總會有贏家，而如果佢哋嘅「相對價值」持續有效的話，今年更隨時成為其表現「最牛的一年」添。
絲絲講嘅係，○七年底成立，扎根香港嘅「Segantii Asia-Pacific Equity Multi-strategy Fund」。佢哋今年九個月賺咗成29%，如果呢個成績可以維持到年底，就會超越目前最佳成績，在○八年完成嘅24%增長，而帶領佢哋成立至今「年年賺大錢」嘅基金經理Simon Sadler，隨時成為下一個被基金界熱捧嘅「賺錢之神」。
咁Segantii靠咩策略跑贏o架呢？據阿西門兄接受Eurekahedge訪問時稱，就是「相對價值法」，其應用即係喺同一資產實體，喺不同資產類別的價差中做套利。聽落好似好複雜，其實從概念上而言，即係近似「炒AH價差」的做法。絲絲當堂「哦，原來係咁！」