絲絲講場：光控陳爽為校友出力
香港作為國際金融中心，歷年嚟吸引咗唔少金融專才雲集，而近年嚟自內地嘅金融人才更加愈嚟愈多添。為了團結呢班都係來自內地嘅金融人才，高校聯金融協會喺三年前成立，廣召業界校友，發揮大家專業才能嘅同時，仲不時舉辦研討會同埋喺網站，就兩地的金融服務業嘅改革和發展，提出建議。
150金融專才撐慶典
協會啱啱喺日前舉行成立三周年嘅盛大慶祝典禮，超過150位金融界專才出席撐場，現場可謂星光熠熠。當中擔任協會主席兩年嘅中銀香港助理總裁朱燕來就榮升為永遠名譽主席，而主席呢個重任交畀光大控股（00165）行政總裁陳爽接棒。據絲絲了解，主席一職任期兩年，喺由協會嘅主席團推舉合適嘅人才後，投票推選出嚟。
至於陳總，由於佢擁有華東政法學院法學碩士及港大專業進修學院之法律文憑，更具內地律師及經濟師雙重資格，喺商業銀行及投資銀行又有超過17年豐富經驗，從法律觀點去解決中港兩地金融改革問題，將可大派用場！
李家傑史美倫任顧問
之不過，高校聯金融協會唔單止召集咗一班嚟自內地嘅金融人才，喺佢哋張顧問委員會名單中，原來亦都見到好多大家熟悉嘅金融專家名字，包括滙豐銀行副主席史美倫、恒地（00012）副主席李家傑、恒隆（00101）主席陳啟宗等等，同樣星光熠熠o架！