市場熱線：割禾青骨水鬆人

禮拜日歐盟開峰會，諗住呢幾日係安全期就會瀨嘢，德國總理唔生性，話唔會咁快有終極救市方案，當堂一盆冷水照頭淋，本來唔算大鑊嘢，但衰在個市已經升咗咁多，即係打鞦韆原理，盪得太高就有地心吸力。而氣氛一旦轉淡，美銀同高盛尋晚派成績表隨時踩多腳，但蘋果公司同英特爾則頂住。

穩陣派暫宜觀望

不過，歐盟峰會就算冇特效藥，點都會有短期止痛藥，內容係乜亦只能靠估，就算有好消息都唔代表個市可以再升。但係，暫時亦唔使太灰，有人講錯嘢，隨時有人補鑊，歐股中段已跌幅大收窄，港股期指亦轉高水，古勝暫時會觀望吓先，穩陣派更應睇埋禮拜一魚缸反應至落注，有胡食嘅不妨割禾青。

昨日空軍又再加注，沽空佔大市成交比例由7.93%回升至9.14%，沽空金額最大五隻股票依次係友邦（01299）、中移（00941）、建行（00939）、國壽（02628）及新地（00016）。以恒指今浪由16,170彈到18,908點計，回吐升幅的0.382、0.5及0.618支持，分別位於17,216、17,539及17,862點，最終去到乜嘢位至肯停，始終仲係要睇G20是否真係能夠齊心坐低，出錢又出力去解決問題。

好衰唔衰，新世界（00017）同新中（00917）呢段時間玩供股，其實市弱供股唔係壞事，大股東可以低價增持，集資所得可以低價買地，但小股東就較頭痛，成手蟹貨仲要攞錢出嚟。其實彤叔今年手風的確唔多順，平保（02318）已經損手，而最緊要係睇周大福高價上市嘅計劃搞唔搞得掂。

之前大升嘅股風水輪流轉跌得最多，最明顯例子係累升超過一倍嘅中國玻璃（03300），但最反地心吸力例子係雙樺控股（01241），連升九日肯定呢排最紅。至於最慘嘅肯定係體育用品股，升就冇份，跌就最甘，尋日安踏（02020）、李寧（02331）同特步（01368）齊創新低，唔通證明中國人只可以做山寨，做品牌就死硬？

祖國經濟趨放緩

國產品牌成功例子得聯想（00992）同海爾（01169），聯想早排仲砌低戴爾成為全球PC二哥，真係可喜可賀，台灣嘅HTC亦殺出一條血路。不過，少數成功冇乜代表性，祖國三大電訊商都要被「哎瘋」牽住鼻子走。

祖國尋日上晝公布埋第三季GDP，減慢到9.1%雖叫做差過預期，但唔能夠成為踩低大市藉口。內地經濟放緩係遲早要接受嘅現實，因為基數已經增到好高，由10、9、8、7一路咁落，阿爺應該順其自然，勉強刺激經濟盞消化不良。數據公布後A股亦愈跌愈低，滬綜指再跌57點，好快又會重回匯金入市前個位。

本地魚缸表現仍係全亞洲最差，不嬲都係放大器，前排升幅亦勁過人，所謂食得鹹魚抵得渴，但以散戶識止賺唔識止蝕嘅心理，波動愈大愈易輸錢。

除咗體育用品股之外，太陽能股尋日亦係集體跳水，保利協鑫（03800）、興業（00750）同卡姆丹克（00712）齊跌一成幾，壞消息係美國準備向內地光伏企業展開反傾銷同反補貼調查，自年中以來美國已有三間太陽能電池板企業宣布破產，結果又將責任歸咎於中國產品低價競爭。富士康（02038）成為逆市奇葩，佢阿媽好多動作，計劃投資山西大同、晉城同埋巴西，又話會同保利協鑫合作搞太陽能電池添，每項投資都過千億咁話，但唔知上市公司有冇份玩。

古勝