港股上周五終於都要回一回氣，跌番兩百零點，投資者又面臨人生交叉點，自問睇唔通後市的話，可以再吼番公用股，粵海投資（00270）上周五逆市做好，升5.9%，報4.83元。
雖然市場現時已將粵投與東江水畫上等號，但以截至六月底止中期業績，供水佔集團整體業務的比重約為六成，物業投資則佔約29%。而整體中期純利增長43.7%，至16.17億元，其中供水業務分部業績為14.59億，同比增長僅4%，反而物業投資的分部業績同比增長達85%，可見集團亦不乏其他增長動力。
值得留意的是，為期三年的東江水供水協議，將於本年底完結，需要重新訂定，市場普遍預期水費將會上調，摩通早前就引述粵投管理層指，預料東江水費一二至一四年期間將按年增加5%，並會在十一月中公布。如今十月都已經過咗一半，是真是假，好快會揭盅，一旦屬實，粵投股價勢必水漲船高，隨時有力突破今年高位5.17元，上望5.5元，支持位睇4.5元。
詩詩