孖妹缸湖遊：學好幾招闖缸湖

朱：致富證券大埔分行經理朱永年

韓：京華山一證券元朗分行經理韓思朗

散戶聽消息炒短線

祺祺： 你哋做咗分行經理十幾年，一定見過各式各樣嘅散戶，其實佢哋係咪淨係識得研究PE，之後就唔識其他財務比率架喇？

　朱： 普遍散戶都會經常講PE，不過依家佢哋好醒目，炒股之前會睇咗技術走勢同埋短期消息先至落盤，佢哋仲識得研究港股嘅支持位、阻力位，但對財務比率嘅研究就少啲，不過有時都會講吓PB（市帳率）嘅！

　韓： 基本上有好多散戶都知道咩叫PE，近一、兩年內銀股都幾受歡迎，所以佢哋都識埋PB，不過散戶炒股唔會理呢啲財務比率，因為大家都係炒短線，一日走八轉、十轉真係平常事，所以佢哋主要會睇資金流向同埋技術分析。

祺祺： 原來PE喺魚缸界真係無散戶不識！不過，近期港股走勢咁兇險，佢哋淨係睇技術分析去炒股，其實都幾無保障，買股票唔係應該做足基本因素分析架咩？

　朱： 其實散戶都好理性嘅，有時佢哋聽到某隻股票啲PE好平時，都會問吓我哋嘅意見。不過，我都認同散戶知多啲財務比率會對買賣股票更加有利。正如佢哋鍾意炒買零售股、電訊股咁，有時知道埋點樣計算呢啲行業嘅成本開支、利潤收益，對投資一定係有益嘅！

　韓： 好多短炒散戶真係唔識股票o架！例如有啲師奶散戶，佢連電腦都唔識得開，但就識得睇圖表，仲要識得同你講MACD（平滑異同移動平均線）。而且，大部分散戶都係炒短線，當隻股票升5%都已經急急腳沽貨獲利離場喇，你要佢哋研究PE、PB、NAV（資產淨值），即係等於叫佢哋去買隻股票，然後一年收兩次息，無可能囉！

Jason：樹仁大學金融及經濟學系四年級生Jason

市盈增長率更好使

高妹：你中六開始抽新股，早喺大學一年級就已經考晒HKSI（香港證券專業學會）嘅卷一、七、八、九證券牌照，你真係專業散戶喎！

Jason： 我本身對研究股票有興趣，最鍾意分析銀行股，因為銀行係百業之母。不過我依家仲係學生，所以買賣股票都係長線為主，我嘅投資組合內有七隻股票，包括銀行股、資源股同埋公用股，每年嘅利息回報都唔錯，但近期我都有興趣研究吓零售股，好似I.T（00999）咁。

高妹： 好多散戶買股票都睇技術分析，最熟嘅財務比率就係PE，唔知你對呢方面又有幾熟悉呢？

Jason： 其實PE比較簡單，缺點就係無考慮到上市公司本身嘅盈利增長動力，假如散戶只用PE去揀股，好有可能會錯過咗啲高PE但盈利增長潛力好強嘅股份，所以我會睇埋PEG（市盈增長率），即PE除以每股盈利增長率，呢個財務比率可以幫大家分析一啲高增長行業。

高妹： 我知道要研究零售股，唔少分析員都會睇同店銷售，從而分析嗰間公司嘅真正實力，你又點睇呢？

Jason： 我會睇埋毛利率，因為零售行業涉及較多人力物力，又要面對高昂嘅租金成本，所以毛利率較高嘅公司較有能力應付工資、原材料、租金成本上漲等影響。不過，買咩板塊都好，我都一定會睇管理層質素，因為有啲人可以利用會計準則去美化公司盤數。

高妹： 雖然你年紀輕輕，但你對股票嘅知識都仲多過我同祺祺，我哋真係甘拜下風喇！

Jason： 每個人都希望唔使付出太多精神就可以搵到快錢，不過當你對股票有更多認識，投資就會更加小心，因為知得愈多，戒心就會愈大，反而會幫你做到最正確嘅投資決定。

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk