市場熱線：東方明珠食大茶飯

呢個周末，廣交會據聞幾旺場，G20財長會議冇料到，而「佔領華爾街」行動升級，仲搞到意大利暴亂，尋日「佔領中環」嘅除咗菲傭之外，本港亦有好多團體出嚟反對金融霸權。事件搞落去，將會幫咗奧巴馬開徵「巴菲特稅」掃除阻力，但歐豬嘅緊縮政策會遇到更多示威抗議，錢莊同財團會成為出氣筒。

恒指料挑戰萬九

其實錢莊同投行今年利潤已大縮水，今個禮拜「高佬」派成績表甚至可能會見紅，但金融股發瘟，科技股就補番條數，蘋果電腦創收市新高。祖國錢莊亦係有苦自己知，上月新增貸款又唔見一筆，M2增速放緩，CPI雖符預期但仍係好高，出口又放慢，但數據還數據，個市升起上嚟一於少理，連上周五沽空都縮槓。

蘋果公司iPhone4S在北美及英國正式開賣，多得自由行同胞推波助瀾，據聞上周末旺角水貨價直逼兩萬元關口，早買早享受的同胞肯出三倍多的高價，睇嚟購買力唔單止無受內地水緊影響，也可見同胞對iPhone的瘋愛。祖國移動（00941）上星期話，已經同蘋果公司商討開發TD-LTE技術，到底十畫有幾多撇？未知，古勝留意高通等晶片供應商消息多時，仲未聽聞過會有TD網絡制式晶片供應，但正所謂有智慧不如跟趨勢，既然股市相信的人夠多，即使未有耐見TD iPhone4S真身，炒定先亦無妨，上周五祖國移動逆市抽升2元見75.4元，近期幾次調整跌到72至73元，支持相當穩固，掉頭炒番上78至80元的機會較大。

中移唔跟大市走

個市升咗2,500點回吐番升幅十分之一只係小意思，聯通（00762）玩劈價，照計祖國移動亦受影響，但祖國移動依家變咗恒指put輪，市升佢跌、市跌佢升，粵投（00270）亦係一樣。

最慘係體育用品股又被洗倉，連一向較受人睇好嘅匹克（01968）亦開始唔掂兼要cut店，其他股都要誅九族。古勝一早講過體育用品股有問題，間間都話要開1萬間，6大品牌咪變咗6萬間？而孖屐又逐步被外國品牌侵蝕，全世界「三間」同「一剔」寡頭壟斷，連「V卜」同「奀寶」亦被收購，國產貨點夠鍊？

個市鹹魚翻生，變咗玩落後股大尋寶遊戲，遊戲嘅特徵係由大玩到細，其實細價股亦有大把寶藏，啱啱有副主席兼執董劉夢熊增持股權嘅東方明珠創業（00632）隨時起動，公司新聞通告話佢會去非洲某國同政府高層領導商討鑽油田商機，據聞呢個國家係南蘇丹。

蘇丹自從今年七月分裂成南北兩國之後，擁有當地四分之三石油儲備嘅南蘇丹就成為各方覬覦嘅「大油庫」，中國以前喺蘇丹插晒旗，依家當然唔希望輸畀美國，中國政府同南蘇丹關係密切，當地嘅石油投資會係一個龐大商機。至○九年，成個蘇丹嘅石油儲備估計有67億桶，每日產油量有49萬桶。

南蘇丹油儲龐大

南蘇丹個餅重新分配，東方明珠分到少少已相當和味，劉夢熊呢段時間股權由3.52%增持到6.01%值得憧憬，加埋佢喺內地同國際間有廣泛政治經濟網絡，對公司發展石油及天然氣核心業務好有幫助。而公司亦將會改名做「東方明珠石油」，集團已擁有28.7億元油田資產，除咗旗下猶他州油氣田已順利產油之外，依家正洽購哈薩克斯坦、中東同加拿大多個油田項目，如果傾掂南蘇丹項目嘅話，呢隻細細粒嘅石油股有望飛上枝頭變鳳凰。

古勝