講開股票分析，投資者最多見到嘅，除咗之前講過嘅二三線股─—「拆配合供」之外，大部分都係收購同合併，賣嘢同將資金放入上市公司裏面，以其創造不同市場嘅反應同期望。今次呢個例子，又幾得意，叫做「互控」，當一個案例研究學習學習。
早排民豐企業（00279）同威利國際（00273）以互相認購對方約4,800萬元股份，一來一回錢唔使攞，亦都因為呢一個Deal，大家都各自各成為咗對方嘅單一大股東。
從管理學角度來分析，揸股份少可以當作係策略性投資（或者叫做畀面派對），以呢個個案來睇絕對唔可以咁講，依家簡直係「同撈同煲兄弟」嘅格局。互控嘅做法，好處在於各自上市嘅地位仍然可以維持，當然管理層亦都係有兩個，各自可以發展佢哋現存嘅業務。業務上的一致性又可以提升。但唔好處就係，如果有乜嘢事，分開嘅代價係可以好沉重，點樣分手同埋可能帶動互沽哭泣遊戲，所以每種方法都係有利弊。
投資者分析呢個案例，會因為股價上嘅不平等折讓而令股價進一步受壓。不過，轉個角度來睇，兩間公司嘅業務幾乎係極一致性，往後分析佢哋嘅股價表現，就要以Sammi嘅舊歌──《親密關係》來分析。情況就好似講起Sammi一定要講吓安仔一樣，故事嘅豐富程度會同時提升，大家就更happy，係咪？
香港大學電子金融服務榮譽助理教授徐燦傑