尋日介紹嘅旭光（00067），勁升15%，今日可以再睇吓另一隻「中投三寶」成員中芯國際（00981）。
嚴格嚟講，中芯自○四年上市以來，股價表現基本上係未好過，單睇今年，由五月時高位0.94元跌至八月最低0.335元，跌幅64%，之後有反彈，再兩度回到0.35元，昨日回升6.3%，收報0.42元。
相比起保利協鑫（03800）同旭光中期盈利分別大增3.5倍同1.2倍，中芯中期業績表現屬三寶中最失色，但亦叫做由虧轉盈，賺650萬美元，而備受關注嘅內部人事問題，經先後更換主席及CEO之後，相信亦可告一段落，加上作為內地龍頭晶片商，有國家在背後撐腰，待元氣恢復，其發展前景仍然樂觀，而中期業績轉盈，可以視為重返正軌的第一步。
其餘兩寶先後發力，中芯亦有追落後的機會，不過基於本身質素始終爭啲，建議博反彈亦不宜太勇，小注博其上試上月高位阻力0.495元，支持位放0.385元。
詩詩