流動上網日趨普及，好多人認為對手機商嚟講係一個金礦，不過中移（00941）董事長王建宙尋日就提醒，喺電訊資費趨向下降嘅現實下，中移亦面對收入及客戶增長放緩挑戰。原來早喺○五年首次與Google主席施密特會面，已經表明「以廣告補貼為提供免費電訊服務嘅模式」行不通，仲話即使免費是趨勢，中移亦要抗拒！
自新一代iPhone 4S公布後，市場一般估計，中移暫時仍與iPhone無緣，王建宙尋日重申喺現階段，佢唔方便透露中移幾時會參與iPhone銷售，但就話到九月底，自攜iPhone上台嘅中移客戶已經達到950萬戶。
不過佢承認，中移經歷業務快速增長後，無可避免面對增長放緩嘅現實，業務唔能夠再單靠新增客戶帶動，因為咁，中移除全力推進4G LTE業務外，未來三年會喺全國建立100萬個WiFi熱點及1,000萬個接入點，爭取以數據服務增長，彌補語音通話收入嘅下跌。
余絲韻