滙控（00005）前行政總裁紀勤今年年頭「黯然」離開做咗幾十年嘅地方，但係呢件不愉快事件冇挫到佢嘅銳氣，佢好快就去咗幫愛爾蘭國家資產管理機構（NAMA）把脈，仲開咗藥方畀佢，叫佢請多啲地產專家，減少會計人員喎。
NAMA係愛爾蘭政府兩年前成立嘅，金融海嘯都害到愛爾蘭好慘，金融機構要執手尾，紀勤之所以幫佢哋開藥方，係受到愛爾蘭財政部長，同埋NAMA主席嘅賞識，邀請佢畀意見。
絲絲記得，喺金融海嘯之後，英國政府係咁按低啲銀行家嘅薪酬，紀勤都係受害者之一。唔知係咪呢個原因，紀勤畀NAMA嘅意見就係，當地銀行業員工人工太低，仲話人哋如果唔加人工，一定請唔到人才去愛爾蘭打工。
佢仲形容愛爾蘭嘅銀行係「黑心銀行」，原因係呢度部分工作範疇缺乏人才，而且人工又低。佢建議當地嘅銀行，請多啲高層，好似財務總監咁，就算唔喺出面請，都應該自己培訓，第時行政總裁要「辭官歸故里」嘅時候，都唔使咁徬徨出去搵人才啊，喺自己班子就可以升一個取替。
絲絲唔熟悉愛爾蘭嘅銀行，高層架構係咪過分簡單，但紀勤嘅建議就同依家嘅銀行業做法有啲唔同，不過佢建議銀行請多啲地產專家，就啱晒愛爾蘭地產從業員嘅「合尺」。
余絲韻