市場熱線：聯通獲大行力撐

祖國公布九月出口增長得17.1%，低過孖屐預期，但無阻港股升勢，同前日一樣小回大漲。恒指全日再升428點收day high，國指亦升346點，如果恒指可以上萬九，國指亦可以重上一萬，成交額增加至885億元，暗湧則係期指大低水。

弱股繼續鹹魚翻生

尋日沽空金額亦重上10%以上，沽空最勁係大笨象（00005），佔佢成交接近三成，空軍可能博美國銀行股成績表唔掂。雖然「黑色星期一」魔咒已喺本周被打破，但本周一僅升4點仍係最差，所以不宜揸重貨過周末。

二三線股繼續報復式反彈，呢個零禮拜係股民最開心日子，因為乜股都升，幾乎闔埋眼掟飛鏢實中，總之之前跌得愈甘就彈得最勁，同喺天台掟個波落地原理一樣，尋日輪到爛鐵股，而中遠（01919）、中鐵（00390）、南車（01766）等股亦鹹魚翻生，但原本強勢嘅粵投（00270）、恒安（01044）、祖國移動（00941）等就風水輪流轉。

細摩周四晚派成績表、今日祖國會公布CPI、斯洛伐克再表決EFSF擴大方案，較得人驚嘅係細摩，其實所有投行第三季業績都嗌救命，但如果大市氣氛好嘅話，一個倒下，其他自然會接力，所以冇乜好驚。CPI亦已經封咗頂，祖國甚至已炒緊降低RRR。人仔過完黃金周復市上升之後，連日有神冇氣，尋日個中間價仲要開低，坊間解釋係大陸唔like美國佬，你要我升值、我偏要貶值，中國可以說不！

歐洲錢莊陸續見到曙光，但最大問題仍係「錢從何來？」供股集資？問政府攞？問EFSF攞？如果歐洲好似我哋特區政府咁有錢兼亂咁派，當然乜嘢問題都可解決，衰在歐洲佬志大財疏，所以仍係「大家都有壓力，未解決！」

智能手機銷情理想

以風水輪流轉理論，中資電訊股亦係較弱板塊，孖屐原本預期中電信（00728）會受惠於新「哎瘋」支援CDMA網絡，但中電信反而係最弱嗰隻，而可能冇咗「哎瘋」獨霸地位嘅聯通（00762），又竟然係最強嗰隻，如果孖屐咁易畀你估中就通街都係富翁啦！

巴克萊尋日發表報告撐聯通，預計廉價智能手機係佢增長亮點，依家佢供應嘅3款手機已供不應求，今年底會再有兩款新機推出，即係唔係單靠「哎瘋」食胡，一於大小（客）通殺，第三季仲開拓學生市場。「哎瘋客」當然ARPU特別高，學生客斷估會較低，但食得唔好嘥，網絡開支係固定，多個客就收多啲。巴克萊因為下調了聯通的手機補貼預測，所以相應調高今年的每股盈利預測15%，並同時維持增持的投資評級同目標價21蚊不變。

三隻股比較，聯通係最貴，但亦公認客戶增長最快同最有增長潛力，第三季成績表會係考核。

古勝