歐洲七國咁亂，開完會又開會，Prof. J都真係感同身受，皆因近日都好多會開！呢排全世界都望到實一實，只希望希臘嗰邊唔好有咩問題，唔係就真係一鑊熟。不過，歐洲嗰邊好似都開始傾掂數，未來有機會有一段穩定嘅日子，等大家可以抖抖氣。
不過一波未平，一波又起；今次跌市又快又狠，好多對沖基金都頂唔住，尤其風眼中心歐洲。歐洲最大對沖基金Mangroup，早排就畀客仔大舉贖回，情況直逼雷曼爆煲嗰陣。咪睇小對沖基金嘅影響力，一隻對沖基金係全球各地都有資產分布；一隻龍頭對沖基金都畀客仔贖回，即係全球對沖基金都有機會出現呢個趨勢，大家就會見到非常波動之市況──因為班基金佬瘋狂挾倉、平倉等等。
咁各國政府當然唔會坐視不理啦，依家美證監就希望修訂停板機制，將停板的掛鈎指標由道指轉為標普500，跌幅由之前的10%降至7%；暫停交易個觸發跌幅縮了，但係個時間就短了，縮到得番15分鐘，即係每跌7%就停15分鐘。咁搞法，個市會變成點？咪就係縮佢波幅囉！呢兩個月咁波動，搞到成日出現panic sale，美國證監會自然要做嘢，你話係咪？
停板制度保持住三級制；咩叫三級制？即係畀你冷靜一下先再開放交易！以新例而言，標普指數較前收市價跌7%，就會停15分鐘先再交易；跟住又跌，跌夠14%，又會叫停；再跌夠21%，就全日停！咁你話最壞情況係咩？咪一日跌21%囉！不過跌夠21%之後，全日停晒交易，第二日開番，個場面仲唔恐怖過鬼片？咁就真係冇停板好過有停板喇，你話係咪？
以往停板制又真係好少有用過；一九八七年十月道指單日跌幅22.61%，當時香港驚美國拖累，所以主席李福兆下令停市抖幾日，結果幾日後香港仲跌得大鑊；此後，香港就廢除停板制，亦冇人再提過。事實上，喺今時今日咁波動的市況，你話港交所（00388）又係咪應該諗番吓停市議案呢？
另外，歐洲方面都沒有停低救市步伐；德國下議院通過了擴大歐洲金融穩定機制（EFSF）援助基金規模同權限，規模達5,000億歐元，為市況打支強心針。在信心危機的年代，當然要用信心去挽救啦，你話係咪？對歐盟來講，呢次未嘗唔係好事；歐元體制同以前歐盟中央銀行，都缺乏足夠的共同資金支持，冇一個真正貨幣聯盟，所以大家一定聽好多人講過，要成立一個超主權監察機關。5,000億歐元只係一個開始，如果繼續發展落去，可能真正出現一個新體制，咁歐洲之局面就真係可以穩定下來！
另外，歐洲好多國家都開始實施政策禁止沽空，單單以意大利同法國呢兩個大國家為例，就禁止沽空至十一月十一日，同時間西班牙、比利時等等國家都紛紛加入。隨着市況不穩，歐洲推出的政策就應該愈來愈多喇，大家真係要睇實！
香港大學電子金融服務
榮譽助理教授 徐燦傑