最近樓市淡靜，但市場仍有個別淡市奇葩個案，日前中半山The Albany（雅賓利）就錄得宗做價達1.018億元成交，呢幢係單幢式豪宅，樓齡已經達二十二年，但由於位置同景觀優越，係唔少城市名人嘅住所，包括被譽為「滙豐一姐」嘅前滙豐私人銀行亞洲區行政總裁王以智及伍集成家族等。
絲絲聽市場傳聞今次以逾億元賣出雅賓利複式戶嘅業主係一名女銀行家，所以即時聯想到「滙豐一姐」王以智可能就係呢個單位嘅業主，絲絲睇過土地註冊處資料，個單位業主係VALUE PLUS CAPITAL INC.，據悉屬海外註冊公司，所以依家仲未可以證實一姐係咪呢個單位嘅業主，而按揭銀行則為HSBC REPUBLIC BANK （SUISSE）。
但可以肯定一姐嘅物業投資眼光唔錯，事關呢個複式戶原業主於○三年僅以3,200萬元買入，今次帳面獲利近7,000萬元，升幅逾兩倍。至於一姐對雅賓利似乎情有獨鍾，據聞佢喺○二年以1,900萬元買入一個低層單位，相信該單位「身價」都應升值最少兩倍，市傳仲話佢不只持有一個單位。