窮則變，變則通，銀行猛呻資金成本抽升，息差受壓，坐以待斃實在唔係辦法，永隆銀行深明此道，繼早前推出紅酒貸款及小貸通，近日再推小微企貸款，實行改善息差之餘，照顧埋較基層嘅客戶。
絲絲尋日見到該行按揭及私人貸款中心主管Robbie（蔡爾全），佢話咪以為小微企貸款毋須抵押品，會令銀行壞帳風險增加，因為永隆嘅批核機制好審慎，會做好追收、貸款限額，仲設有專隊定期監察。講真嗰句，貸款額只係十萬至三十萬元，風險好大就未必，但就可以幫到好多有需要嘅企業。
Robbie話，佢哋諗住年底可以有約一百五十個客戶，前陣仲去過科學園，見吓班有興趣借小微企嘅公司。咁又係，唔少研發公司坐鎮嘅科學園，的確喺「拉客仔」嘅好地方。
雖然Robbie嘅準備工夫做到足，不過講到尾客戶最着緊嘅都係貸款息率，一向數口精嘅Robbie就透露，如果客戶搵到擔保人，公司質素又好好嘅話，最平做到最優惠利率（P）加一點五厘喎。