市場熱線：國航受惠人仔升值

港股反而挾到七彩，恒指朝早已急升超過700點，除咗跟住美股大升之外，內銀H股普遍升約一成，手法同上周二逼牛證打靶如出一轍，尋日亦係扯到上熊證街貨密集區，跟住個市慢慢回軟，全日恒指仍升430點，收報18,141點，國指更大漲4.37%，成交增至837億元，但期指大低水145點。

歐債危機採拖字訣

近幾日「歐豬」國及包括滙控（00005）在內的歐洲銀行，其違約風險掉期溢價（CDS）由八月底高位回落，支持環球股市呈現一個快速反彈，但中長線而言，CDS溢價仲係比七月時高一大截，希臘終極解決方案似乎有拖無欠，債權人同出資的歐央行始終就撥備比例講唔掂數，似乎唔拖到再有銀行出事，其餘四隻「歐豬」的國債問題未有耐可以坐低慢慢傾。

歐洲央行行長特里謝出席歐洲議會經濟及貨幣事務委員會時提出，歐洲危機已經擴散到系統性層面，主權問題由較小經濟體系蔓延到較大的歐洲經濟體系，短期融資市場「水緊」情況惡化，由於歐盟金融體系相連性高，大幅蔓延風險升溫，將影響歐盟金融穩定，衝擊實體經濟。

特里謝任期仲有唔夠廿日，歐央行行長就會改朝換代，本來大可拍拍屁股走人，仲繼續用咁嚴重的字眼呼籲歐盟同志們要齊心解決當前危機，多少反映今次危機，央行內未有耐達成共識。

古勝禮拜一時話過，喺低位升過2,000點應可挾走班老散淡友，結果尋日恒指已升抵第2站目標價18,200至18,300點，下一站係萬九點，但呢個關口阻力十分大，冇乜特別消息都幾難突破。不過，尋日唔係淨挾高指數咁簡單，有過千隻股票上升，頭50大升幅統統超過一成，二三線股通常會快過恒指見底。

四大國貨錢莊H股當中，最好係農行（01288）升12.8%，最差係建行（00939）升5.8%。A、H背馳最明顯係煤炭股，祖國啱啱宣布實施資源稅計價開徵，兩大石化股逆市下跌，油氣股已係預咗，較特別嘅係焦煤同稀土亦納入徵稅範圍，三大煤炭A股分別跌3至4個巴仙，但兗煤（01171）同中煤（01898）H股均升逾6%。

電器股海爾（01169）、創維（00751）同TCL多媒體（01070）亦大升，話說黃金周電器特別好賣，十月連冷氣機都唔放過，原因係「家電下鄉」取消前快手搶平貨，內地術語叫「井噴效應」，同汽車優惠政策取消前趕住買車一樣。孖屐繼續搵弱勢股買、強勢股沽，南車（01766）同中鐵（00390）呢類發霉股大反彈，兩隻鉛酸電池股天能（00819）同超威（00951）則被質低，股民亦要食住呢條水搵食。

油價雖然回升，但飛機股尋日亦識飛，國航（00753）升6.6%算較少，皆因佢國際航線較多，如果全球經濟衰退對佢經濟影響最大；中國八月份內地航空客運量僅增長2.8%，令人對飛機股信心有動搖，但祖國民航業冇理由突然減速，古勝認為一個月數據不能作準，飛機股仲係具增長能力嘅公司。

短線仍有反彈空間

六至八月係飛機股嘅最輝煌日子，三個因素包括高鐵失事、人仔升值同油價下跌，但炒完之後好快丟淡晒，九月同十月初飛機急降，東航（00670）同國航同創52周新低，睇番估值，飛機股今年預測PE只係5、6倍左右，計埋風險因素都係抵買，國航更有大飛機（00293）趁低密密增持，顯然5個幾係抵到爛嘅價錢，現價雖已反彈到接近6蚊，但呢排大把股反彈三幾成，以佢咁低PE兼業務無大礙，加上人仔持續升值，博多15%並非太貪。

古勝